Tanınmış kinorejissor Eldar Quliyev 80 yaşında vəfat edib

Azərbaycan kinorejissoru, ssenarist, Xalq artisti Eldar Quliyev bu gün 80 yaşında dünyasını dəyişib.

E.Quliyev 18 yanvar 1941-ci ildə Bakıda anadan olub.

1960-1966-cı illərdə Moskvada Ümumittifaq Dövlət Kinematoqrafiya İnstitutunun rejissorluq fakültəsində, Sergey Gerasimovun kursunda təhsil alıb. 1967-ci ildən “Azərbaycanfilm” kinostudiyasında işləyib. “Biri vardı, biri yoxdu…” adlı ilk qısametrajlı filmini çəkib. Kifayət qədər tanınmış bədii və sənədli filmlərin müəllifidir. 1969-cu ildə ilk böyük ekran əsəri olan “Bir cənub şəhərində” filmi ilə özünü təsdiqləyib və bu filmlə Azərbaycan kinosunda yeni bir mərhələnin təməlini qoyub.

1979-cu ildə “Babək” filmini çəkib və bu film peşəkarlıq səviyyəsinə, kütləvi və batal səhnələrin miqyasına görə heç də xaricdə istehsal olunan bu tipli filmlərdən geri qalmayıb. Həmin illərdə “Babək” filmi 52 ölkə tərəfindən satın alınıb. Bunlarla yanaşı, “Ən vacib müsahibə”, “Var olun, qızlar…”, “Ürək… Ürək…”, “Nizami”, “Nə gözəldir bu dünya…”, “Girov”, “İstanbul reysi”, “Dərvişin qeydləri” və s. filmlərə quruluş verib.

E.Quliyev həmçinin bir neçə filmin ssenari müəllifidir. Çəkdiyi filmlərin bir neçəsi kinofestivallarda mükafatlara layiq görülüb. 1978-ci ildə Azərbaycan SSR Dövlət Mükafatı laureatına layiq görülən rejissor dörd il sonra Xalq artisti adı təltif olunub.

Azərbaycan Dövlət Mədəniyyət və İncəsənət Universitetində kino kafedrasının professoru olan rejissor 1987-ci ildən “Debüt” Eksperimental Gənclik yaradıcılıq studiyasının rəhbəri kimi fəaliyyət göstərib. O, 2014-cü ildə Azərbaycan Respublikasının Fərmanı ilə 15 may 2014-cü ildə yaradılmış Bakı Beynəlxalq Multikulturalizm Mərkəzində Himayəçilik Şurasının üzvlərindən biri olub.

Azərbaycan Professional Kinorejissorlar Gildiyasının ən fəal yaradıcılarından olan E.Quliyev yaradıldığı gündən həmin qurumun prezidenti olub.

Eldar Quliyev bəstəkar Tofiq Quliyevin oğlu, ssenarist Nərminə Quliyevanın atası idi.(oxu.az)